BABALA! SENSITIBONG BALITA:
Isang kalunos-lunos na insidente ang gumulat sa mga residente ng Barangay San Miguel, Guimba, Nueva Ecija, matapos matagpuang patay at kinatay ang isang alagang baka habang nakatali sa puno sa isang bukirin sa lugar.
Sa isang live video ng Kahakot TV, ipinakita ang sinapit ng baka na pagmamay-ari ng tiyuhin ng nagbahagi ng video.
Makikita sa nasabing live na buo pa ang ulo at leeg ng baka, subalit halos buto na lamang ang natira sa katawan nito, indikasyon na ito ay kinatay sa mismong lugar.
Matinding galit at sama ng loob ang naramdaman ng may-ari ng baka pati na rin ng mga nakasaksi sa pangyayari.
Ayon sa Kahakot TV, ang mga salarin ay tinawag nilang “walang puso at walang magawa sa buhay” dahil sa malupit na pagpatay sa inosenteng hayop.
ALAGANG BAKA, KINATAY NANG BUHAY HABANG NAKATALI SA PUNO SA SAN MIGUEL, NUEVA ECIJA
Samantala, ilang netizen ang nagbahagi rin ng kaparehong karanasan, kung saan ang iba ay nagsabing ang kanilang mga alagang baka ay buntis pa umano nang katayin ng hindi pa rin natutukoy na mga salarin.
Nagpayo naman ang ilan sa publiko na huwag nang iwanan sa bukid ang kanilang mga alagang hayop, dahil umano sa hirap ng buhay ay dumarami na ang gumagawa ng ganitong uri ng pagnanakaw.
Matatandaan na noong Oktubre 2025, isang insidente rin ng pagnanakaw at pagkatay ng baka ang naitala sa bayan ng Guimba, kung saan tinangay ang baka at dinala sa gitnang bahagi ng bukirin bago kinatay.
Nanawagan noon ang nagbahagi ng mga larawan na agad ipagbigay-alam sa mga awtoridad kung may magbenta ng murang karne sa mga kalapit na lugar.
Umaasa ngayon ang mga may-ari ng hayop at mga kabarangay na matukoy at mahuli ang mga nasa likod ng insidenteng ito, at mabigyan ng nararapat na leksyon upang hindi na muling makapangbiktima at upang maprotektahan ang mga taong marangal na lumalaban sa hamon ng buhay.
