Sa gitna ng selebrasyon ng Araw ng mga Puso, isang ama mula Barangay San Andres, Victoria, Tarlac ang pinuri online.
Marami sa netizens ang natuwa at naantig dahil ginawa niyang espesyal ang Valentine’s Day para sa kanyang anak na LGBTQ.
Nagviral si Les Quijano Tuquero matapos yayain sa simpleng date ang 9-anyos na anak na si Rein Ezekiel Tuquero o “Kiela.”
Dahil nasa ibang bansa ang kanyang asawa, siya muna ang ka-Valentine ng anak at ipinakita ang buong suporta at pagmamahal.
Sa social media, ibinahagi ni Les ang kanyang damdamin, “Happy Valentine’s my Queen Ezekiel Tuquero. I love you palagi, nak.”
Dagdag pa ni Les sa kanyang mensahe sa Facebook post, “Higit pa sa bulaklak, tanggap kita kung sino ka.”
Ayon sa ama sa Tarlac, madalas silang dalawa ng anak ang magkasama habang nasa nagtatrabaho sa malayo ang kanyang asawa.
Sinabi pa niya na hindi niya kailanman ikinahiya ang pagkatao ng kanyang anak, sa halip ay pinili niyang unawain ito.
Pahayag pa ni Les, masaya ang kanyang anak sa gusto niya, kaya susuportahan niya ito sa ninanais niyang maging siya.
Samantala, naging makulay ang kanilang date dahil may pista sa Victoria, namasyal sila sa plaza, kumain ng bibingka at balot.
Sumakay rin sila sa ilang rides, bukod dito, mas naging makahulugan ang gabi nang bigyan niya ng bulaklak ang anak.
Ito ang kauna-unahang bouquet na natanggap ni Ezekiel, hindi matatawaran ang kanyang saya dahil tanggap siya sa kung sino siya.
May tatlong anak si Les, pantay ang kanyang pagmamahal, mensahe niya sa kapwa magulang na tanggapin ang kanilang mga anak.
Aniya, hindi magiging masaya ang mga anak kung pipigilan sila, kaya naging simbolo ang simpleng date ng tunay na pag-ibig.
