BAGONG PAG-ASA AT KUMPIYANSA: Hindi lang basta medical procedure ang naganap sa Gen. Tinio Medicare & Community Hospital, kundi pagtatapos ng maraming taon ng pagtitiis para sa ilang Novo Ecijano.
Sa programang Surgical Caravan ng Kapitolyo sa ilalim ng pamumuno nina Governor Oyie Umali at Vice Governor Lemon Umali, muling naghatid ng libreng operasyon ang programa para sa mga kababayang nangangailangan ng tulong medikal.
Sa loob ng tatlong taon, madalas ay suot ni Jin ang kanyang sumbrero.
Hindi dahil sa fashion, kundi dahil ito ang nagsisilbing panangga niya para itago ang cyst sa kanyang ulo.
Sa unang pagkakataon na naglakas-loob siyang magpatingin, hindi niya akalaing mabibigyan siya ng pagkakataon na maoperahan at matapos ang kanyang pagtatago.
Samantala, mahabang pagtitiis naman ang dinanas ni Wilfredo na may bukol simula pa noong 2004.
Dahil sa kakulangan ng pinansyal, mahigit dalawang dekada siyang naghintay ng pagkakataon na maoperahan nang libre.
Maging si Ken, na may “salapi” o sobrang daliri, ay nabigyan din ng kumpiyansa matapos ang operasyon.
Ang programang ito ay bahagi pa rin ng health program ng Pamahalaang Panlalawigan sa pamamagitan ng Provincial Health Office.
Sa halip na ang pasyente ang bumiyahe nang malayo, ang operasyon na mismo ang inilalapit sa mga district hospitals para masigurong bawat distrito ay may access sa libreng serbisyong medikal.
Nakatakdang magpatuloy ang Surgical Caravan sa iba pang bahagi ng Nueva Ecija upang matulungan ang mas marami pang Novo Ecijano na nangangailangan ng libreng operasyon.
