Pormal na pinasinayaan ang bagong multi-purpose covered court ng Restituto B. Peria National High School sa Barangay Bibiclat, Aliaga, Nueva Ecija bilang bahagi ng patuloy na pagpapalakas ng pasilidad pang-edukasyon sa lalawigan.
Ang pagpapasinaya ay pinangunahan ni Vice Governor Gil Raymond “Kuya Lemon” M. Umali, bilang kinatawan ng ama ng lalawigan na si Governor Aurelio “Oyie” M. Umali.
Ayon kay Vice Governor Umali, ang nasabing pasilidad ay magsisilbing lugar para sa mga aktibidad ng paaralan tulad ng palakasan, programa, at mga gawaing pang-akademiko.
Bukod dito, maaari rin itong gamitin bilang evacuation center sa oras ng kalamidad, na malaking pakinabang para sa buong komunidad.
Ang proyekto ay naisakatuparan sa pamamagitan ng Seal of Good Local Governance, Incentive Fund (SGLG-IF), patunay ng maayos at tapat na pamamahala ng Pamahalaang Panlalawigan.
Dumalo rin sa seremonya ang mga opisyal ng DepEd, sa pangunguna ni Dr. Ronaldo Pozon, School Division Superintendent.
Bilang katuwang ng DepEd sa pagsusulong ng dekalidad na edukasyon, ibinahagi ni Pozon kung gaano sya nasisiyahan sa tinatamasa ng bawat paaralan at mag-aaral sa buong lalawigan ng Nueva Ecija.
Ipinahayag naman ng mga guro at mag-aaral ang kanilang pasasalamat sa proyektong magpapabuti sa kanilang mga gawain at magbibigay ng mas ligtas at komportableng pasilidad.
