Sinimulan na ng Department of Education o DepEd ang nationwide early registration para sa School Year 2026–2027 bilang paghahanda sa darating na pasukan.
Batay sa opisyal na Facebook post ng DepEd, hinihikayat ang mga magulang at guardian ng mga batang papasok sa Kindergarten, Grade 1, Grade 7, at Grade 11 na makipag-ugnayan sa kanilang napiling pampublikong paaralan upang maitala ang kanilang mga anak.
Ayon sa DepEd, layunin ng maagang pagpaparehistro na matukoy ang inaasahang dami ng mga mag-aaral sa susunod na school year. Makakatulong ito sa mas maayos na pagpaplano sa bilang ng guro, silid-aralan, learning materials, at iba pang kinakailangang pasilidad sa mga pampublikong paaralan.
Isinasagawa ang early registration mula January 31 hanggang February 27, 2026, alinsunod sa DepEd Order No. 17, s. 2025, na nagtatakda ng mga patakaran at proseso para sa aktibidad.
Partikular na binigyang-diin ng DepEd ang kahalagahan ng maagang pagpaparehistro sa mga mataong lugar, gaya ng National Capital Region, kung saan karaniwang mataas ang bilang ng mga nag-e-enroll sa mga pampublikong paaralan.
Pinapayuhan ang mga magulang at guardian na direktang makipag-ugnayan sa papasukang paaralan para sa schedule at mga kinakailangang dokumento.
Para sa karagdagang detalye, maaaring bisitahin ang opisyal na Facebook page at website ng DepEd.
