Tututukan ni Senador Bam Aquino ang oil excise tax suspension upang matiyak na mararamdaman ng publiko ang pagbaba ng presyo ng diesel at gasolina.
Ayon kay Aquino, mahalagang masigurong direktang napapakinabangan ng mamamayan ang oil excise tax suspension. Dahil ang pagtaas ng presyo ng krudo ay nagdudulot din ng pagtaas sa presyo ng mga pangunahing bilihin.
Target ng panukala na makatulong sa transport sector, maliliit na negosyo o MSMEs at mga manggagawa.
Sa ilalim ng panukala, maaaring bumaba ang presyo ng:
Diesel ng hanggang ₱10 kada litro
Gasolina ng hanggang ₱7 kada litro
Aprubado na sa kamara ang panukalang Senate Bill No. 1982 bilang susog sa House Bill No. 8418. Kaya hindi na kakailanganin ang isang bicameral conference committee. Hinihintay na lamang ang pirma ng Pangulo upang maging ganap itong batas.
Binigyang-diin din ni Aquino na magbabantay ang Senado sa mga oil companies. Ito ay para matiyak na ang pagbaba ng buwis ay makikita sa presyo sa mga gasolinahan.
Sa gitna ng krisis sa Middle East, nananawagan ang senador ng agarang aksyon upang maprotektahan ang kabuhayan ng mga Pilipino at maiwasan ang pagsasara ng mga negosyo.
