Inaasahang magbibigay ng mabilis, maayos at magiliw na serbisyo ang mga health workers sa 86 na ospital ng Department of Health. Bahagi ito ng bagong walong-point patient experience standards ng kagawaran.
Layunin nitong mapabuti ang karanasan ng mga pasyente sa mga DOH hospital. Ayon kay DOH Assistant Secretary Tagumpay Maniquis, ibinigay ni Health Secretary Edwin Mercado ang standards sa 86 hospital directors. Tinawag itong “commander’s guidance” para sa serbisyong dapat maranasan ng bawat pasyente.
HEALTH WORKERS, DAPAT MAGBIGAY NG AGARANG ATENSYON
Kabilang sa pangunahing pamantayan ang agaran at magiliw na atensyon pagdating pa lamang sa ospital. Saklaw nito ang mga nurse, doktor at iba pang health workers na nagbibigay ng serbisyo.
Ayon kay Maniquis, dapat manatiling sentro ng trabaho ang pasyente. Tugon din ito sa mga hinaing tungkol sa ilang hindi magandang karanasan sa pagtanggap.
Gayunman, hindi lahat ng health workers ay kabilang sa mga reklamong ito. Sa halip, nais ng DOH ng malinaw at pare-parehong pamantayan sa pakikitungo.
WALONG PAMANTAYAN, SAKLAW ANG SERBISYO AT PASILIDAD
Hindi lamang pakikitungo ng kawani ang saklaw ng bagong standards.
Kabilang dito ang maaliwalas na kapaligiran at malinis at mabangong banyo. Dapat ding gumagana ang mga ilaw at hospital equipment.
Kasama rin ang maaasahang social support at organisadong pila.
Kailangan ding malinaw at updated ang impormasyong nakapaskil sa ospital. Mahalaga rin ang komportableng kondisyon ng pasilidad, kabilang ang sapat na bentilasyon.
DOH, SUSUBAYAN ANG PAGPAPATUPAD NG 8 PAMANTAYAN SA PAGBIBIGAY NG SERBISYO
Gagamitin ang walong pamantayan bilang bahagi ng assessment sa mga hospital directors. Mangangasiwa ang mga assistant secretary ng DOH sa pagsubaybay sa pagsunod ng mga ospital.
Sa bagong standards, hindi lamang gamutan ang binibigyang-pansin. Kasama rin ang paraan ng pagtanggap at pag-asikaso sa bawat pasyente.
Layunin ng DOH na maging mas mabilis, maayos at magalang ang serbisyo sa mga ospital.