Ilang buwan na tiniis ni Rochelle Paris Romero ang matinding pananakit dulot ng bato sa apdo dahil hindi nila kayang tustusan ang operasyon sa pribadong ospital. Sa pamamagitan ng Seruhano ng Alagang Umali Surgical Caravan sa Sto. Domingo District Hospital, nabigyan siya ng pagkakataong sumailalim sa libreng operasyon.
Ayon kay Rochelle, tinatayang aabot sa P55,000 hanggang P65,000 ang gastusin sa operasyon sa pribadong ospital kaya matagal niya itong ipinagpaliban. Matapos makakuha ng medical clearance, matagumpay siyang sumailalim sa operasyon nang walang anumang gastos.
Hindi lamang si Rochelle ang nabigyan ng panibagong pag-asa sa pamamagitan ng Seruhano ng Alagang Umali. Kabilang din sa mga sumailalim sa libreng operasyon sina Mark Harold Velasco, Mark Kevin Pangilinan at iba pang mga benepisyaryo.
Ayon sa mga benepisyaryo, dahil sa kakulangan ng kakayahang pinansyal ay matagal nilang hindi naipagamot ang kanilang mga karamdaman. Sa pamamagitan ng programa ng Pamahalaang Panlalawigan ng Nueva Ecija, nabigyan sila ng pagkakataong makapagpagamot nang walang iniintinding gastusin.
Sa patuloy na pagsasagawa ng Seruhano ng Alagang Umali Surgical Caravan, mas marami pang Novo Ecijano ang nabibigyan ng pagkakataong makapagpagamot at makabalik sa mas malusog na pamumuhay nang hindi nabibigatan sa gastusin.
