Plano ngayon ng pamahalaang panlalawigan ng Zambales na ideklara ang sikat na Liwliwa beach sa San Felipe, bilang isang “danger zone.”
Nabuo ang pasyang ito matapos ang isinagawang konsultasyon ng Zambales Provincial Foreshore Lease Management Council kasama ang iba pang concerned government agencies.
Dahil dito, pansamantalang ipagbabawal ang paglangoy habang inililikas ang mga nakabaong bakal at semento mula sa nasirang resorts sa dagat.
Ayon kay Zambales Governor Hermogenes Ebdane Jr, malaking banta sa kaligtasan ng mga turista ang mga natagpuang matutulis na bagay doon.
Bukod pa rito, maraming konkretong bahay at pasilidad ang tuluyang winasak ng mga nagdaang malakas na habagat at bagyo.
Kaya naman ang mga pampang na dating tinatayuan ng mga gusali ay naging “reclaimed by the sea” o muling nabawi ng tubig-dagat.
Samantala, sinabi ng Pamahalaang Panlalawigan na mananatili ang babala hanggang sa matapos ang paglilinis ng mga basura at iba pang kalat.
Gayunpaman, patuloy ang pagpapatupad ng mga mahigpit na patakaran upang matiyak ang kaligtasan ng publiko at ng kapaligiran.