Mas malawak na benepisyo at mas matibay na seguridad sa trabaho ang maaaring matanggap ng mga Barangay Health Workers (BHW) matapos aprubahan ng Senado sa ikatlo at huling pagbasa ang Magna Carta of Barangay Health Workers o Senate Bill No. 1905 sa botong 20-0-0.
SENADO, INAPRUBAHAN ANG MAGNA CARTA NG MGA BHW
Layunin ng panukalang batas na kilalanin ang mahalagang papel ng mga BHW bilang mga frontline health worker at magtakda ng iisang pamantayan para sa kanilang registration, certification, pagsasanay, mga insentibo at proteksyon.
P3,000 BUWANANG VOLUNTEER BENEFIT AT IBA PANG INSENTIBO, NAKAPALOOB SA PANUKALA
Kapag nalagdaan ng Pangulo at naging ganap na batas, makatatanggap ang mga rehistrado at sertipikadong volunteer BHW ng hindi bababa sa P3,000 buwanang volunteer benefit, transportation assistance o reimbursement, hazard allowance, taunang cash gift, insurance coverage, libreng legal assistance, scholarship opportunities, access sa psychosocial at mental health services, at competency-based training at certification programs.
MAS MALAWAK NA BENEPISYO AT MAS MATIBAY NA PROTEKSYON
Maaari ring maging kwalipikado ang mga BHW sa civil service eligibility at mga plantilla position sa mga lokal na pamahalaan. Makatatanggap din ng P10,000 loyalty incentive ang mga may hindi bababa sa 15 taong tuloy-tuloy at kasiya-siyang serbisyo.
Kabilang din sa mahahalagang probisyon ng panukala ang mas matibay na proteksyon laban sa arbitraryong pagtanggal sa serbisyo dahil lamang sa pagpapalit ng lokal na administrasyon o iba pang political considerations. Hindi rin maaaring basta-bastang mapalitan ang isang Barangay Health Worker dahil lamang sa pagbabago ng administrasyon. Nakasaad din sa panukala ang kaukulang pananagutan sa sinumang lalabag sa mga probisyong ito kapag naging ganap na batas.
Kasama rin sa panukala ang pagtatatag ng National Barangay Health Workers Information System upang magkaroon ng maayos na talaan ng kwalipikasyon, assignment, pagsasanay at mga benepisyong natatanggap ng mga BHW. Nakapaloob din ang BHW Deployment Subsidy upang matulungan ang mga lokal na pamahalaang may limitadong pondo sa pagpapatupad ng mga benepisyong itinakda ng panukala.
Ayon kay Senate Committee on Health Chairperson at principal sponsor ng panukala na si Senator Risa Hontiveros, layunin nitong mabigyan ng mas maayos na suporta at seguridad ang mga Barangay Health Worker na katuwang sa pagpapatupad ng Universal Health Care. Sinabi naman ni Senator Raffy Tulfo na hindi dapat nakabatay sa political loyalty ang pananatili sa serbisyo ng isang Barangay Health Worker.
PHO: 6,595 BHW, KABUUANG BILANG SA NUEVA ECIJA
Sa Nueva Ecija, may kabuuang 6,595 Barangay Health Workers batay sa tala noong Mayo 2026 batay sa tala ng Provincial Health Office.
Ayon kay Abby Elisan, BHW Municipal Federated President, umaasa sila na maisasabatas ang Magna Carta upang maipatupad ang security of tenure, mga insentibo, regular na pagsasanay at civil service eligibility para sa mga kwalipikadong Barangay Health Worker.
Matapos ang pag-apruba ng Senado, inaasahang ipapadala ang panukala sa Malacañang para sa lagda ng Pangulo bago ito tuluyang maging ganap na batas.
