DAGDAG-PASAHE: Nananatiling magulo at hindi malinaw para sa mga tricycle driver ang ipatutupad na dagdag-pamasahe dahil sa kawalan ng opisyal na taripa mula sa kinauukulan.
Ayon kay Gregorio Gotam Jr., vice president ng kanilang TODA, wala pa silang natatanggap na pormal na gabay kaya nagkakaiba-iba ang paniningil sa mga pasahero.
Samantala, sinabi naman ni Ferdinand Isidro na hindi pa niya alam kung magkano ang tamang singil dahil hindi pa niya nakikita ang sinasabing fare matrix at tanging sa social media lamang siya nakakakuha ng impormasyon.
Sa kasalukuyan, pabago-bago ang bayad ng mga pasahero na umaabot mula P40 hanggang P60, na nagdudulot ng kalituhan sa parehong driver at commuter.
Iginiit ni Gotam na kahit pa ipatupad ang taas-pamasahe, hindi pa rin ito sapat upang matapatan ang patuloy na pagtaas ng presyo ng gasolina, kung saan kalahati ng kita ay napupunta lamang sa krudo.
Dahil dito, nananawagan ang mga driver ng malinaw na patakaran upang maiwasan ang kalituhan at matiyak ang patas na kita sa kanilang hanapbuhay.
