Kasabay ng pagsisimula ng tag-ulan, muling dinarayo ng mga mamimili ang mga nagtitinda ng sariwang exotic food sa tapat ng Kapitolyo sa Barangay Singalat, Palayan City.
Ayon kay Florencia Ignacio, araw-araw mula alas-9:00 ng umaga hanggang alas-5:00 ng hapon siyang nagbebenta ng palakang bukid, bulig, igat at hito sa abot-kayang presyo.
Nagkakahalaga ang palakang bukid ng P100 hanggang P120 bawat tali, habang P100 hanggang P120 naman bawat piraso ang bulig at hito depende sa laki. Samantala, nasa P280 hanggang P300 kada kilo ang presyo ng igat.
Si Sherwin Gonzales na mula pa sa Talavera ay dumadayo pa sa Lungsod ng Palayan upang makabili ng sariwang bulig. Aniya, masarap gawin na luto dito ang paksiw, paksiw na may gata, pinangat at sinampalukan.
Dahil mas madaling makahuli ng mga lamang-tubig sa panahon ng tag-ulan, inaasahang mananatiling mataas ang suplay at demand ng mga ito sa mga susunod na araw.
