Umani ng magkahalong reaksyon at matinding puna mula sa publiko ang naging pamamaraan at dalas ng pag-Facebook Live ni Senador Alan Peter Cayetano habang kinakaharap ang isyu ng kaniyang opisyal na attendance sa Senado.

Diretsahang kinuwestiyon ng ilang residente at estudyante kung bakit tila mas inuuna umano ng mambabatas ang pagla-live sa social media kaysa sa pisikal na pagpasok at pagdalo sa mga pormal na session sa lehislatura.

Muling uminit ang usapin matapos mag-live sa Facebook sina Cayetano at Senador Robin Padilla habang bumabiyahe patungong Sarangani at General Santos.

Sa naturang video, binati pa ni Cayetano ang mga nagagalit sa kaniyang paggamit ng platform, na nagbunsod naman sa publiko na balikan ang kaniyang mga nakaraang record ng pagliban sa opisina.

TRABAHO SA SENADO O PAGBO-VLOG? PUNA NG PUBLIKO SA ABSENCES NG SENADOR

Dismayado ang ilang mamamayan dahil sa tila pag-prioritize ng senador sa pagiging “vlogger” kaysa sa pag-asikaso sa mga batas sa loob ng session hall.
Ayon sa residenteng si Walcy Ayson, hindi tama na naglalaan ng oras sa pagla-live ang isang opisyal habang nasa oras ng trabaho. Aniya, dapat ay doon ito sa opisina pumasok upang makipag-usap sa mga kapwa senador.

Katulad nito ang naging sentimyento ng residenteng si Rodel na nagpaalala na pinapasweldo ng taong bayan ang mga mambabatas upang pumasok at hindi para mag-online lamang.

Ayon naman kay Myra Rose Garcia, malinaw na pinapakita ng senador na mas prayoridad nito ang social media kaysa sa paggawa ng batas, habang tinawag naman ito ni Francel Macaraig na “unfair” para sa mga regular na pumapasok sa Senado.

Mariin ding nanawagan ang mga estudyanteng sina Kylie Mercado at Mary Heart Guevarra na dapat ay mas maging active ang mga opisyal sa gobyerno at tutukan ang problema ng Pilipinas.

TRANSPARENCY AT PUBLIC ENGAGEMENT: ANG DEPENSA SA PAGGAMIT NG SOCIAL MEDIA

Sa kabila ng mga pambabatikos, may ilang mamamayan naman ang nagtanggol sa estilo ng mambabatas.

Ayon sa estudyanteng si Valentin Perry, depende naman sa senador kung ginagawa niya ito sa kaniyang bakanteng oras.

Para naman kay Kyle Zalde, may benepisyo ang pag-online kung gagamitin ito upang makatulong at magbigay-kaalaman sa tao.

Dumedepensa naman si Cayetano na mabisang tool ang social media para sa pampublikong kamalayan at pakikipag-ugnayan.

Hinimok pa niya ang publiko na gamitin ang internet upang maging “pang-gising” at isumbong ang mga anomalya sa lipunan.

‘TOP ABSENTEE’ RECORD SA LEHISLATURA, MULING NAUNGKAT

Gayunpaman, batay sa mga opisyal na ulat ng Senate Legislative Journal Service, naging malaking isyu talaga ang attendance ng senador sa mga nakaraang taon.

Sa rekord ng 20th Congress na inilabas ni Sen. Juan Miguel Zubiri, si Cayetano ang ikalawa sa may pinakamaraming absences kung saan 20 session days lamang ang kaniyang dinaluhan mula sa kabuuang 58 araw.

Opisyal din siyang idineklara bilang “Top Absentee” noong Pebrero 2024 matapos magtala ng 18 absences sa loob ng 54 araw, at naitala rin noong 2017 bilang mambabatas na may pinakamababang attendance sa Senado bago siya lumipat sa DFA