Mahigit 200 Persons Deprived of Liberty (PDL) sa Nueva Ecija Provincial Jail ang sumailalim sa libreng HIV screening at awareness activity na tinawag na Project Kalinga.
Isinagawa ang aktibidad sa pangunguna ng pamunuan ng piitan sa ilalim ni Jail Warden Joel John De Leon, katuwang ang Freedom Park Badminton Club at ang Provincial Health Office.
Layunin ng programa na tugunan ang patuloy na pagtaas ng kaso ng HIV at mapalawak ang kaalaman tungkol dito, lalo na sa mga komunidad na may limitadong access sa serbisyong pangkalusugan.
Bahagi ng programa ang isang lecture mula sa isang infectious disease specialist, kung saan ipinaliwanag ang mga paraan ng pag-iwas sa HIV at ang kahalagahan ng tuloy-tuloy na gamutan para sa mga may sakit.
Layunin din ng Project Kalinga na mabawasan ang stigma at takot kaugnay ng HIV testing sa loob ng piitan, at hikayatin ang mas maraming PDL na magpasuri.
Dagdag pa dito, napag-alaman din na ang Safe Space Treatment Facility ay nagbibigay umano ng libreng consultation, free testing screening, free counceling at nagbibigay din aniya sila ng libreng gamot.
Ayon sa mga organizer, mahalagang maabot ang mga sektor tulad ng mga PDL upang matiyak na ang serbisyong pangkalusugan ay naipagkakaloob sa lahat.
Sa tulong ng mga volunteer, naisagawa ang screening nang maayos, ligtas, at kumpidensyal para sa lahat ng kalahok. Sa pamamagitan ng inisyatibang ito, pinatutunayan na ang kalusugan ay isang karapatan ng bawat isa, kahit nasa loob ng piitan.
