Nadagdagan pa ang bilang ng mga benepisyaryo ng ‘Project LAWA at BINHI’ o Local Adaptation to Water Access at Breaking Insufficiency through Nutritious Harvest for the Impoverished sa Zaragoza, Nueva Ecija.
Ito ay matapos ang matagumpay na pagpapatupad ng proyekto noong nakaraang taon.
Labis ang pasasalamat ng lokal na pamahalaan sa Department of Social Welfare and Development o DSWD Region 3 at Provincial Social Welfare and Development Office (PSWDO) dahil sa paglawak ng programang ito.
Layunin ng proyekto na makatulong sa mga vulnerable communities sa pamamagitan ng cash-for-work o cash-for-training habang sinusolusyunan ang kakulangan sa pagkain at tubig.
Ayon kay Eden Belmonte mula sa Zaragoza Municipal Social Welfare and Development Office, mula sa 100 na benepisyaryo sa Sto. Rosario Old noon ay nadagdagan ito ng 100 mula naman sa Sta. Lucia Old.
Sa loob ng sampung araw, babayaran sila ng DSWD ng 570 pesos bawat araw kapalit ng kanilang serbisyo.
Paliwanag pa ng DSWD, ang Project LAWA at BINHI ay nakatuon sa food security, water security, human security, at knowledge capacity development.
‘PROJECT LAWA AT BINHI,’ MAS PINALAWAK SA ZARAGOZA
Para sa food security, magtatanim ang mga benepisyaryo ng mga binhi ng gulay bilang mapagkukuhanan ng pagkain.
Samantala, ang water security naman ang magiging sagot sa El Niño sa pamamagitan ng pagbuo ng sariling lawa.
Mag-iipon dito ng tubig na gagamitin kapag mahina ang supply at pandilig sa mga pananim na gulay.
Kasabay nito, mayroon ding knowledge capacity development kung saan tinuruan ang mga benepisyaryo tungkol sa tamang pagpapatakbo ng proyekto.
Samantala, ayon sa Punong Barangay ng Sto. Rosario Old na si Reynaldo Domingo, marami ang natulungan sa kanilang barangay ng programa na ito.
Base sa kanilang karanasan, nag-alaga sila ng tilapia at nagtanim ng gulay na napakinabangan sa panahon ng anihan.
Naibebenta rin nila ang ibang ani para sa maintenance ng programa, at ang sobra ay ipinamamahagi sa mamamayan.
Nagpasalamat din ang Punong Barangay ng Sta. Lucia Old na si Agustin Bao Jr. sa biyayang ipinagkaloob sa kanila.
Aniya, malaking tulong ito sa pagme-maintain ng daluyan ng tubig at sa pagkakaroon ng kanilang sariling communal garden.
