Ang Social Media Ban para sa mga batang edad 16 pababa ay pormal nang inihain ni Senador Sherwin Gatchalian. Sa ilalim ng Senate Bill No. 2066, layunin nitong ilayo ang kabataan sa mga panganib at banta online.
Binigyang-diin ng senador na dapat nang umaksyon bago pa lumala ang sitwasyon sa bansa. Batay sa datos, 92.4% ng mga batang Pinoy na online ay may sariling social media accounts.
Ipinapakita nito na halos lahat ng kabataan ay babad na sa internet kahit kulang sa proteksyon. Obligado ang mga social media platforms na magpatupad ng age-verification system sa kanilang mga users. Kailangan nilang burahin ang accounts ng mga bata at pigilan ang muling paggawa ng mga duplicate nito.
Bukod dito, dapat magbigay ang mga kumpanya ng parental control tools para sa mga magulang. Ang DICT ang itatalagang ahensya na mag-iimbestiga at magpataw ng mga parusa gaya ng multa.
Kung hindi susunod ang mga platforms, ipag-uutos ng NTC na i-block ang kanilang domain o IP address. Maaari ring bawiin ang lisensya ng operasyon ng mga kumpanyang paulit-ulit na lalabag sa batas.
Target din ng bill na limitahan ang mga “addictive features” gaya ng autoplay at algorithm recommendations. Ang mga disenyong ito ay sadyang nagpapatagal sa paggamit ng mga bata sa kanilang mga gadgets.
Ayon sa senador, hindi sapat ang mga kasalukuyang batas upang protektahan ang kabataan sa social media.
Samantala, isang survey mula sa Arkipelago Analytics ang nagpakita na 8 sa 10 kabataan ang tutol sa limitasyong ito. Mahalaga raw ang social media sa kanilang pag-aaral at komunikasyon.
Sa huli, siniguro ni Gatchalian na ang kanyang panukala ay susunod pa rin sa Data Privacy Act.
