Opisyal nang nanumpa si San Diego Mayor Todd Gloria bilang ika-84 na presidente ng United States Conference of Mayors (USCM).
Dahil dito, siya ang kauna-unahang Filipino-American at unang LGBTQ+ political figure na hahawak sa posisyon na ito sa kasaysayan ng organisasyon.
Bukod dito, si Gloria rin ang kauna-unahang alkalde mula sa San Diego na nahalal sa pwestong ito, kung saan pinalitan niya si Oklahoma City Mayor David Holt.
Naganap ang kanyang inaugurasyon sa ika-94 na Annual Meeting ng USCM na idinaos sa Long Beach, California.
Bagong Agenda ni Todd Gloria
Sa kanyang inaugural address, ibinahagi ni Todd Gloria ang kanyang bagong agenda para sa susunod na taon na tinatawag na “Mayors Deliver.”
Ang programang ito ay nakatutok sa tatlong mahahalagang isyu: abot-kayang pabahay (affordable housing), ligtas na mga komunidad (safe neighborhoods), at pagpapababa ng mga gastusin (lowering costs).
Ayon sa kanya, ang mga mamamayan ay hindi naghahanap ng political theater o drama sa politika.
Sa halip, ang tunay na mahalaga sa mga tao ay kung may sapat ba silang kakayahan na magkaroon ng sariling bahay, kung ligtas ang kanilang mga kalsada, at kung anong klaseng kinabukasan ang naghihintay para sa kanilang mga anak.
Hamon at Pagsubok sa Pamumuno ni Todd Gloria
Kasabay nito, binalikan din ni Todd Gloria ang mga mabibigat na hamon na hinarap ng mga lungsod nitong mga nakaraang taon.
Kabilang na rito ang pandemya, mga natural disasters, inflation, political division, at mga karahasan sa iba’t ibang komunidad.
Ipinaliwanag niya na malaki ang sakripisyo ng mga alkalde dahil madalas silang magsimula ng araw sa pagdiriwang ng isang ribbon cutting, ngunit bago matapos ang gabi ay nakikiramay na sila sa mga nagdadalamhating pamilya.
Kaya naman, binigyang-diin niya na sa panahon ng krisis, hindi political rhetoric o mabulaklak na salita ang kailangan ng tao, kundi katatagan, malasakit, at tunay na leadership.
Kasaysayan at Layunin ng USCM
Samantala, nais ni Gloria na ang kasalukuyang henerasyon ng mga alkalde ay maalala sa hinaharap bilang mga pinuno na pumili sa competence kaysa chaos, aksyon kaysa paralisis, at pagkakaisa sa halip na dibisyon.
Nais niyang pamunuan ang organisasyon gamit ang pragmatismo, partnership, at pagiging positibo.
Ang United States Conference of Mayors (USCM) ay itinatag noong 1932 bilang isang opisyal at nonpartisan na organisasyon.
Sa kasalukuyan, kinakatawan nito ang higit sa 1,400 na mga lungsod sa Amerika na may populasyong humigit kumulang 30,000.
Nagsisilbi rin itong pambansang tinig na nagtataguyod at nagpapasulong sa mga isyung may kinalaman sa mga lokal na pamahalaan sa buong bansa.
