Walang Plastikan Program ang panukalang isinusulong ni Pampanga First District Representative Carmelo “Pogi” Lazatin, Jr. para maipatupad sa buong Pilipinas.
Sa ilalim ng naturang panukalang House Bill No. 7781, ang bawat isang kilong plastik na basura ay pwedeng ipalit sa isang kilong bigas.
Dahil dito, mas mapapalakas ang tamang waste segregation habang nakatutulong sa mga pamilyang nangangailangan ng pagkain.
Ang Walang Plastikan Program ay mula sa tagumpay ng Angeles City kung saan naging epektibo ito mula noong 2022.
Ayon kay Lazatin, malaki ang naitutulong nito para mabawasan ang mga plastik na itinatapon sa mga dumpsite at katubigan.
Bukod sa kalinisan, tinutugunan din ng panukalang na ito ang problema sa gutom, lalo na para sa mga marginalized sectors.
Samantala, ang mga makokolektang plastik ay gagamitin sa paggawa ng mga sustainable brick pavers para sa mga lokal na proyekto.
Upang maging maayos ang takbo nito, kailangang makipag-ugnayan ang bawat lokal na gobyerno sa kanilang mga barangay Materials Recovery Facilities.
Bukod sa bigas, maaari ring magtakda ang mga lungsod ng sariling exchange rates o point systems na angkop sa kanilang lugar.
Gayunpaman, binigyang-diin ni Lazatin na ang mahalaga ay ang partisipasyon ng bawat Pilipino sa pag-aalaga ng ating kalikasan at kapaligiran.
Sa pamamagitan nito, masisiguro na ang mga plastik na basura ay hindi lamang kalat, kundi magiging kapaki-pakinabang.
