Bamboo Coffin ang nais maipatent ng limang fresh graduates mula sa Veritas College of Irosin at humihingi ngayon ng tulong at suporta.
Layunin nilang maprotektahan at mapaunlad ang kanilang imbensyong “From Nature to Rest: Bamboo Coffin”.
Kamakailan, nakilala ang kanilang proyekto sa social media, at nakatanggap ng positibong pagtanggap sa publiko na nagpahayag ng suporta at paghanga.
BAMBOO COFFIN, KINILALANG BEST FEASIBILITY STUDY
Ayon sa grupo, kinilala ang kanilang proyekto bilang Best Feasibility Study, gayunman, wala pa silang sapat na pondo para maisagawa ang patent application.
Dahil dito, umaapela at umaasa silang may mga indibidwal, ahensya, at organisasyong tutulong sa kanila at makakuha ng gabay.
Mahalaga rin ang suportang pinansyal upang maprotektahan at mapaunlad pa ang kanilang imbensyon.
Binubuo ang grupo nina Francia Fortes at Rienald Escame mula sa Irosin Barrenechea Scott Edrian ng Bulan at Jayson Balbalosa at Chester Ivan Castro ng Bulusan.
Lahat sila ay mula sa lalawigan ng Sorsogon na pinagsama-sama ang kanilang kaalaman upang mabuo ang proyekto.
SUPORTA PARA SA BAMBOO COFFIN, PATULOY NA HINIHILING
Nauna nang nakatanggap ng papuri ang kanilang proyekto nang ipinagkaloob nila ang kauna-unahang bamboo coffin sa isang pamilyang nangangailangan.
Wala umanong kakayahan ang pamilya na bumili ng kabaong kaya nagamit ang kanilang imbensyon bilang tulong sa kapwa.
Ayon sa grupo, bahagi ito ng kanilang pangako na ang kanilang proyekto ay hindi lamang negosyo kundi para makatulong sa mga kapos-palad.
Sa ganitong paraan, nais nilang maipakita ang halaga ng kanilang proyekto sa komunidad.
BAMBOO COFFIN, MAS ABOT-KAYANG ALTERNATIBO
Layunin ng bamboo coffin na maging mas abot-kayang alternatibo sa tradisyonal na kabaong habang isinusulong ang paggamit ng materyales na mas makakalikasan.
Naniniwala ang grupo na mahalaga ang pangangalaga sa kalikasan. Kasabay nito, nais nilang makapagbigay ng praktikal na pagpipilian sa mga pamilya.
Umaasa ang grupo na maipapatent ang kanilang imbensyon. Sa pamamagitan nito, mas mapoprotektahan ang kanilang konsepto.
Higit sa lahat, umaasa silang mas marami pang pamilya ang matutulungan sa hinaharap. Patuloy silang nananawagan ng suporta upang maisakatuparan ang layuning ito.
